ပေါင်မီးသတ်မှ ဆောင်းမဝင်ခင် မီးဘေးကြိုတင်ကာကွယ်ရေးလုပ်ငန်းများ စတင်ဆောင်ရွက်

0
7962

ပေါင်၊ နိုဝင်ဘာ ၁၅
ဆောင်းအဝင် အရှေ့လေကျရောက်သည့်ကာလမတိုင်မှီတွင် ပေါင်မြို့နယ်မီးသတ်မှ လေတိုက်ခတ်ချိန် တွင် မီးလောင်မှုမရှိစေရေး မီးဘေးကြိုတင်ကာကွယ်မှုများ ပြုလပ်နေကြောင်း မြို့နယ်မီးသတ်ဦးစီးဌာနထံမှ သိရသည်။

“မီးလောင်မှုမဖြစ်အောင် ကျွန်တော်တို့လုပ်ရမယ့် တာဝန်ပိုင်းကို မလစ်ဟင်းအောင် လူအသင့်၊ စက်အသင့်၊ ဆီအသင့်၊ ရေအသင့်ဖြစ်အောင်လုပ်ထားပါတယ်။ မီးသတ်တပ်ဖွဲ့ဝင်တွေကိုလည်း နေ့စဉ်မနက် (၈) နာရီမှာ လေ့ကျင့်မှုတွေလုပ်ပေးနေပါတယ်။ ပြည်သူဘက်ကလည်း မီးကြွင်းမီးကျန်ကိုဂရုစိုက်ကြပါ။ မီးနဲ့ပတ်သက်ပြီး သတိအမြဲရှိရှိအသိရှိရှိနေထိုင်ဆောင်ရွက်စေလိုပါတယ်”ဟု ပေါင်မြို့နယ်မီးသတ်ဦးစီးမှုး ဦးစိုးကျော်သူ ကပြောသည်။

ပေါင်မြို့နယ်မီးသတ်တပ်ဖွဲ့၏ အစီအစဉ်အရ တပ်ဖွဲ့ဦးစီးမှုး ဦးစိုးကျော်သူ ဦးစီးပြီးသန္ဓေအရံမီးသတ်အဖွဲ့များမှ နိုဝင်ဘာလဆန်းပိုင်းက စတင်ပြီး ရွာစဉ်အလိုက် တစ်ရွာချင်း သွားရောက်ကာပညာပေးလုပ်ငန်းများဆောင်ရွက်နေကြကြောင်းတွေ့ရသည်။

ရပ်/ကျေးများရှိ အုတ်ရေကန်၊ သဘာဝရေကန်များကို မီးလောင်မှုဖြစ်စဉ်ရှိသောအခါ ရေရနိုင်ရန် အခြေအနေစစ်ဆေးခြင်း၊ မီးဘေးကြိုတင်ကာကွယ်ရေးအတွက် လက်ကမ်းစာစောင်များကို အိမ်ရှင်မများ အများဆုံး လာတတ်သည့် ဈေးတွေတွင် ပေးဝေခြင်း၊ ယာဉ်များစက်များကို အသင့်အနေအထားဖြစ်အောင်စီစဉ်ထားခြင်းစသည့်လုပ်ငန်းများအပြင် နေ့စဉ်ညဦးပိုင်းများတွင် မီးသတိပေး ကြော်ငြာချက်များ ပြုလုပ်လျက်ရှိ ကြောင်း သိရသည်။

ပေါင်မြို့နယ်တွင် ၁၉၇၉ခုနှစ်က အရှေ့လေတိုက်ခတ်စဉ် ပေါင်း၊ ကဒါ၊ ကဒုံစီးရပ်ကွက် ၃ခုမှ အိမ်ခြေ ၈၀ ရာခိုင်နှုန်းခန့် မီးလောင်သွားခဲ့ပြီးလွန်ခဲ့သော ၅နှစ်ခန့်ကလည်း ဇင်းကျိုက်တိုးချဲ့ ၃ ရပ်ကွက် မီးလောင်မှုဖြစ်ပွားခဲ့သဖြင့် အိမ်ခြေတစ်ရာကျော်မီးလောင်ဆုံးရှုးံခဲ့သည်။

ပေါင်မြို့နယ်တွင် ပုံမှန်အားဖြင့် အရှေ့လေတိုက်ခတ်စဉ် လေတိုက်နှုန်းတစ်နာရီမိုင်(၃၀)ထိရှိတတ်သဖြင့် အထူးဂရုပြုကြရန် မီးသတ်ဌာနက ဆိုသည်။

ပေါင်မြို့နယ်တွင်ယခင်နှစ်က မီးလောင်မှု ၃ ကြိမ်ဖြစ်ပွားခဲ့ပြီး၂၀၁၆ခုနှစ်အတွင်း ၄ကြိမ်ဖြစ်ပွားခဲ့ရာ ပေါ့ဆမှုကြောင့်မီးလောင်မှုအများဆုံးဖြစ်ကြောင်းမီးသတ်ဌာနက ထုတ်ပြန်ထားသည်။

ပေါင်မြို့နယ်အတွင်း မီးသတ်ကားရှိသည့်ရွာ ၈ ရွာရှိနေပြီး ပေါင်မြို့နယ်မီးသတ်ဌာနတွင် မီးသတ်ယာဉ်သုံးစီး၊ ရေသယ်ယာဉ်တစ်စီးရှိကာ သန္ဒေမီးသတ်အင်အား ၂၄ ဦးနှင့် အရံမီးသတ်အင်အား (၈၁၁) ဦး ဖွဲ့စည်း ထားပြီး မီးဘေးကာကွယ်ရေးလုပ်ငန်းလုပ်ဆောင်နေကြောင်း ပေါင်မြို့နယ်မီးသတ်ဦးစီးဌာနထံမှ သိရသည်။

သတင်း – ဝရဇိန် (ပေါင်)

Leave a Reply

This site uses Akismet to reduce spam. Learn how your comment data is processed.