အစိုးရသက်တမ်းအတွင်း မွန်ပြည်နယ်၌ နိုင်ငံခြားရင်းနှီးမြုပ်နှံမှု ကန်ဒေါ်လာ သန်း(၆၀၀)ကျော် ဝင်ရောက်ခဲ့

0
1151

မော်လမြိုင် မေ ၁၇

ယခုအစိုးရသက်တမ်း(၃)နှစ်အတွင်း မွန်ပြည်နယ်အတွင်းရှိ စီးပွားရေးလုပ်ငန်းများတွင် နိုင်ငံခြားရင်းနှီးမြုပ်နှံမှု (၁၄) ခု ၊ အမေရိကန်ဒေါ်လာ (၆၂၂.၄၇၈) သန်းခန့် ဝင်ရောက်ခဲ့ကြောင်း မွန်ပြည်နယ် ရင်းနှီးမြုပ်နှံမှုနှင့် ကုမ္ပဏီများ ညွှန်ကြားမှုဦးစီဌာန စာရင်းများအရ သိရသည်။

ဝင်ရောက်ခဲ့သည့် ရင်းနှီးမြုပ်နှံမှုများတွင် မြန်မာနိုင်ငံရင်းနှီးမြုပ်နှံမှုကော်မရှင် (MIC) မှ ခွင့်ပြုသည့်လုပ်ငန်း (၁၀)ခုနှင့် ပြည်နယ်ရင်းနှီးမြုပ်နှံမှုကော်မတီမှ ခွင့်ပြုခဲ့သည့် လုပ်ငန်း (၄)ခု ပါဝင်ကြောင်း သိရသည်။

ထိုင်း နှင့် တရုတ်နိုင်ငံတို့က အများဆုံး လာရောက်ရင်းနှီးမြုပ်နှံခဲ့ကြခြင်းဖြစ်ပြီး ရေနံနှင့်သဘာဝဓာတ်ငွေ့လုပ်ငန်း ၊ စက်မှုလုပ်ငန်းနှင့် အခြားဝန်ဆောင်မှု လုပ်ငန်းများတွင် လာရောက်ရင်းနှီးမြုပ်နှံခဲ့ကြခြင်းဖြစ်သည်။

ရာဘာအပင်အိုများကို ပေါင်းခံပြီး ကျိတ်ခွဲကာ အထပ်သားများပြုလုပ်သည့် လုပ်ငန်းများတွင်မူယာယီရင်းနှီးမြုပ်နှံခွင့်ကိုမပြုရန့် ပြည်နယ်အစိုးရမှ မူဝါဒချမှတ်ထားပြီးဖြစ်ကြောင်း သိရသည်။

“ ရာဘာစက်မှုကဏ္ဍမှာတော့ ယာယီရင်းနှီးမြုပ်နှံခွင့်မပြုဖို့ ပြည်နယ်အစိုးရက မူဝါဒချမှတ်ထားတယ် “ ဟု မွန်ပြည်နယ် ရင်းနှီးမြုပ်နှံမှုနှင့် ကုမ္ပဏီများ ညွှန်ကြားမှုဦးစီဌာန လက်ထောက်ညွှန်ကြားရေးမှူး ဦးမင်းသိန်းဦးက ပြောသည်။

ထို့ပြင် ဇန်နဝါရီလအတွင်း၌ နေပြည်တော်တွင် ပြုလုပ်ခဲ့သည့် 2019 invest Myanmar Summint တွင် မွန်ပြည်နယ်ဝန်ကြီးချုပ် ဒေါက်တာအေးဇံမှ ပြည်နယ်အတွင်း လာရောက်ရင်းနှီးမြုပ်နှံနိုင်သော လုပ်ငန်းလေးခုကိုလည်း မိတ်ဆက်ခဲ့သည်။

ယင်းတို့မှာ ကျိုက်ထိုမြို့နယ်တွင်ဆောင်ရွက်မည့် ကိုရီးယားစက်မှုဇုန်စီမံကိန်း ၊ မုဒုံမြို့နယ်ရှိ ရာဘာစီးတီး ၊ ကျိုက်ထီးရိုးဇုန် မြို့ပြစီမံကိန်းနှင့် ကျိုက်ထိုမြို့ပြ ဖွံ့ဖြိုးရေး စီမံကိန်းတို့ ဖြစ်သည်။

အဆိုပါစီမံကိန်းများသည် မြန်မာနိုင်ငံရင်းနှီးမြုပ်နှံမှုဥပဒေအရ ဖွံ့ဖြိုးရေးဇုန်တွင် ပါဝင်နေတာကြောင့် လာရောက်ရင်းနှီးမြုပ်နှံသူများအတွက် အခွန်ကင်းလွတ်ခွင့် (၅)နှစ် ရရှိမည်ဖြစ်ကြောင်း သိရသည်။

မွန်ပြည်နယ် ရင်းနှီးမြုပ်နှံမှုကော်မတီကို ၂၀၁၇ ခုနှစ် ဇူလိုင်လက ဝန်ကြီးချုပ်မှ ဥက္ကဠနေရာဖြင့် နိုင်ငံတော်သမ္မတမှ ဖွဲ့စည်းပေးခဲ့ခြင်းဖြစ်ပြီး မြန်မာကျပ်ငွေ သန်း (၆၀၀၀) ၊ အမေရိကန်ဒေါ်လာ (၅)သန်းအထိ တန်းဖိုးရှိသည့် ရင်းနှီးမြုပ်နှံမှုများကို အဆိုပါကော်မတီမှ ခွင့်ပြုပေးနိုင်သည်ဟု သိရသည်။

သတင်း – နောင်ခန့်

Leave a Reply

This site uses Akismet to reduce spam. Learn how your comment data is processed.